ഫുട്ബോള് ലോകകപ്പുകളിലെ മിന്നുന്ന പ്രകടനങ്ങളിലൂടെ ആരാധകരുടെ മനസ്സ് കീഴടക്കിയ ഇതിഹാസ മെക്സിക്കന് ഗോള്കീപ്പര് ഗില്ലര്മോ ഓച്ചോവ വിരമിച്ചു. 41-ാം വയസ്സിലാണ് പ്രൊഫഷണല് ഫുട്ബോളില് നിന്ന് വിരമിക്കല് പ്രഖ്യാപിച്ചത്. ലയണല് മെസ്സി, ക്രിസ്റ്റ്യാനോ റൊണാള്ഡോ എന്നിവര്ക്കൊപ്പം ആറു ഫിഫ ലോകകപ്പുകളില് രാജ്യത്തെ പ്രതിനിധീകരിച്ച അപൂര്വ്വ താരങ്ങളുടെ ക്ലബ്ബില് ഇടംനേടിയാണ് ഓച്ചോവ ബൂട്ട് അഴിച്ചുവെക്കുന്നത്.
മെക്സിക്കോയ്ക്കായി 150-ലധികം അന്താരാഷ്ട്ര മത്സരങ്ങളില് ഗ്ലൗസണിഞ്ഞ ഓച്ചോവ, ലോകകപ്പ് വേദിയിലെത്തുമ്പോള് കാണിക്കുന്ന തകര്പ്പന് ഫോമിലൂടെയാണ് 'ലോകകപ്പ് ഇതിഹാസം' എന്ന വിശേഷണം സ്വന്തമാക്കിയത്. 2014 ബ്രസീല് ലോകകപ്പില് ആതിഥേയരായ ബ്രസീലിനെതിരെ നടന്ന മത്സരത്തില് നെയ്മര് ഉള്പ്പെടെയുള്ള വന്നിരയുടെ അറ്റാക്കുകളെ തടഞ്ഞുനിര്ത്തി നടത്തിയ 6 അവിശ്വസനീയ സേവുകള് ഓച്ചോവയുടെ കരിയറിലെ ഏറ്റവും മികച്ച പ്രകടനങ്ങളിലൊന്നായാണ് വിലയിരുത്തുന്നത്. 2018 റഷ്യ ലോകകപ്പില് നിലവിലെ ചാമ്പ്യന്മാരായിരുന്ന ജര്മ്മനിയെ മെക്സിക്കോ 1-0 ന് അട്ടിമറിച്ച മത്സരത്തിലെ നട്ടെല്ല് ഓച്ചോവയുടെ പ്രകടനമായിരുന്നു. 2022 ഖത്തര് ലോകകപ്പില് പോളണ്ടിനെതിരായ മത്സരത്തില് റോബര്ട്ട് ലെവന്ഡോവ്സ്കിയുടെ പെനാല്റ്റി തടുത്തിട്ട് താരം വീണ്ടും ശ്രദ്ധാകേന്ദ്രമായി.
മെക്സിക്കോയ്ക്കായി 150-ലധികം മത്സരങ്ങളില് പങ്കെടുത്ത താരം 2006, 2010, 2014, 2018, 2022, 2026 ലോകകപ്പുകള് കളിച്ചു. കോണ്കാകാഫ് ഗോള്ഡ് കപ്പില് മെക്സിക്കോയ്ക്കൊപ്പം 5 തവണ കിരീടനേട്ടമുണ്ട്. അമേരിക്കന് ക്ലബ്ബുകളിലും യൂറോപ്പില് അയാക്സിയോ, മലാഗ, സ്റ്റാന്ഡേര്ഡ് ലീജ്, സാ ലെര്ണിറ്റാന തുടങ്ങിയ ക്ലബ്ബുകളിലും നീണ്ടകാലം തിളങ്ങിയ ശേഷമാണ് ഇതിഹാസ ഗോള്കീപ്പര് കളിമൈതാനങ്ങളോട് വിടപറയുന്നത്.
content highlights: Legendary World Cup Star: Historic Mexican Goalkeeper Guillermo Ochoa Retires